دارىگەردىڭ تاعايىنداۋىنسىز قولدانىلعان انتيبيوتيكتەر يممۋنيتەتتى السىرەتىپ، دەنساۋلىققا زيان كەلتىرەدى — الماتى ينفەكسيونيستى. بۇل تۋرالى جۇقپالى اۋرۋلار ءبولىمىنىڭ باستىعى، فتيزيوحيرۋرگ، فتيزيوپۋلمونولوگيا ورتالىعىنىڭ پۋلمونولوگى ابزال مالباسقانوۆ وڭىرلىك كوممۋنيكاسيا قىزمەتىنىڭ الاڭىندا وتكەن ونلاين-سۇحبات بارىسىندا ايتتى. ول تۇرعىندارعا كوروناۆيرۋس ينفەكسياسىن، پنيەۆمونيانى ءوز بەتىمەن ەمدەمەۋگە شاقىردى.

ا. مالباسكانوۆ كوبىنە تۇرعىندار كوروناۆيرۋس ينفەكسياسىن وزدەرى ەمدەۋگە بەيىم ەكەندىگىن اتاپ ءوتتى.

«كوروناۆيرۋستىق پنيەۆمونيا – ۆيرۋس تۋدىراتىن اۋرۋ. انتيبيوتيكتەر-باكتەرياعا قارسى قولدانىلاتىن دارىلەر. انتيبيوتيكتەردى قولدانۋ ارقىلى يممۋنيتەتىمىزدى السىرەتىپ، دەنساۋلىعىمىزعا زيان كەلتىرەمىز. سوندىقتان ۇيدە انتيبيوتيكتەرمەن ءوزىن-وزى ەمدەۋگە بولمايدى»، — دەپ ءتۇسىندىردى ا. مالباسكانوۆ.

ينفەكسيونيست دارىگەردىڭ ءتۇسىندىرۋى بويىنشا، اۋرۋ بەلگىلەرى بايقالعان جاعدايدا تەز ارادا دارىگەرگە جۇگىنۋ قاجەت. اۋرۋدىڭ قالاي ءوتىپ جاتقانىن، قاي دەڭگەيدە ەكەندىگىن مامان عانا انىقتاي الادى. قوسىمشا كلينيكالىق-رەنتگەندىك تەكسەرۋدەن ءوتىپ، ارنايى تاعايىنداۋدان كەيىن عانا دارىلىك پرەپاراتتاردى قولدانۋعا بولادى. كوپ جاعدايدا وسى پروسەدۋرالاردان وتكەن ناۋقاستار تولىق جازىلۋعا مۇمكىندىك الىپ جاتىر.

«كەيبىر ادامدار حالىقتىق ەمدەۋ ادىستەرىنە جۇگىنىپ جاتىر. ونىڭ سوڭى ۋاقىتتى تەككە وتكىزىپ الۋمەن، اسقىنۋلارمەن اياقتالىپ جاتادى. كەيىن مەديسينالىق ۇيىمدارعا قابىلدانعاننان سوڭ ەمدەۋ شارالارى باسقا فورمادا بولۋى مۇمكىن»، — دەدى ول.

ال اۋرۋ بەلگىلەرى پايدا بولعان جاعدايدا قالا تۇرعىندارىنا تەز ارادا مەديسينالىق قىزمەتكەرلەرىنە جۇگىنۋ قاجەتتىگىن ايتامىز. سونداي-اق، ساراپشى بارلىق تۇرعىندى پروفيلاكتيكالىق شارالاردى ساقتاۋعا، سالاۋاتتى ءومىر سالتىن ۇستانۋعا شاقىرادى. سۇراقتار تۋىنداعان جاعدايدا 1406 نەمەسە 3000-505 نومىرىنە حابارلاسۋ كەرەك.